Prokuroria Speciale është tërhequr nga ndjekja penale ndaj njërit prej të akuzuarve për vrasjen e politikanit serb, Oliver Ivanoviq.

Në fjalën përfundimtare, prokurori special Burim Çerkini tha se në mungesë të provave tërhiqet nga ndjekja penale ndaj të akuzuarit Rade Basara.

Çerkini tha se është vërtetuar se në kohën e vrasjes së Ivanoviqit, i akuzuari Basara nuk ka qenë në Mitrovicë por ishte në Kroaci.

Prokurori ka thënë se përmes ndihmës juridike ndërkombëtare e kanë vërtetuar se Basara ka qenë në shtetin kroat.

“Si Prokurori Speciale duke u bazuar në mungesë të provave për të akuzuarin Rade Basara tërhiqemi nga ndjekja penale”, ka deklaruar Çerkini.

Në këtë rast, për përfshirje në vrasjen e Ivanoviqit, e cila kishte ndodhur në janar të 2018-ës, po akuzohen Marko Roshiq, Nedelkjo Spasojeviq, Dragisha Markoviq, Zharko Jovanoviq, Silvana Arsoviq dhe Rade Basara, raporton “Betimi për Drejtësi”.

Ndërsa për të akuzuarit tjerë, ai tha se mbetet ne tërësi pranë aktakuzës derisa tha se nga administrimi i provave, dëgjimi i dëshmitarëve dhe provave materiale është vërtetuar se pesë të akuzuarit tjerë kanë kryer veprën penale me të cilën ngarkohen.

Ai propozoi që të akuzuarit të shpallen fajtorë dhe të dënohen sipas ligjit.

Prokurori fjalën e tij përfundimtare e ka dorëzuar me shkrim derisa tash po vazhdon dhënia e fjalës përfundimtare e avokatëve mbrojtës të të akuzuarve.

Në seancën e 13 qershorit, Basara kishte vendosur të mbrohej në heshtje.

Ndryshe, seanca fillestare ishte mbajtur më 11 shkurt 2020, kurse Gjykata Themelore në Prishtinë, më 6 prill 2020, kishte refuzuar kërkesat për hudhjen e aktakuzës së 27 dhjetorit 2019 dhe kundërshtimet e provave.

Pas ankesave të katër avokatëve, Gjykata e Apelit kishte aprovuar ankesat e tyre dhe çështja ishte kthyer në rivendosje dhe nga Themelorja u kërkua të eliminohen kundërthëniet, duke i dhënë mundësi prokurorit për t’u deklaruar ose për ta korrigjuar dhe plotësuar aktakuzën në mënyrë që të jetë në përputhje me nenin 241 të KPPRK-së.

Sipas aktakuzës, të akuzuarit Nedejklo Spasojeviq, Marko Roshiq, Rade Basara dhe Silvana Arsoviq akuzohen se në bashkëpunim me të pandehurit Zheiko Bojiq, Zvonko Veselinoviq dhe Milan Radoiçiq, të cilët gjenden në arrati dhe dy të pandehur tjerë të panjohur, duke vepruar si grup kriminal me qëllim të shtrirjes së kontrollit në pjesën veriore të Mitrovicës, si në jetën politike dhe ekonomike dhe veprimtarinë e përgjithshme të grupit kriminal të organizuar, kanë vepruar me dashje dhe dijeni për të kryer veprën penale të vrasjes së rëndë, ku secili nga të pandehurit ditën kritike kur edhe ka ndodhur vrasja e tani të ndjerit Oliver Ivanoviq, kanë kryer veprime inkriminuese konkrete për qëllim të grupit në fjalë, me ç’rast si pasojë e veprimeve të këtij grupi kriminal të organizuar ka ardh deri te vrasja e tani të ndjerit Ivanoviq.

I akuzuari Dragisha Markoviq akuzohet për “Zbulim të fshehtësisë zyrtare” nga neni 433, par. 2.1 të Kodit Penal. Markoviq po ashtu bashkë me Zharko Jovanoviq akuzohen edhe për “Keqpërdorim të detyrës zyrtare në bashkëkryerje” nga neni 422, par.1 lidhur me par.2, nënpar. 2.2 lidhur me nenin 31 të Kodit Penal.

Po ashtu, i akuzuari Jovanoviq ngarkohet edhe për veprën penale “Mbajtje në pronësi, kontroll ose posedim të paautorizuar të armëve” nga neni 374, par.1 të Kodit Penal. Kurse, i akuzuari Nedeljko Spasojeviq ngarkohet edhe me veprën penale “Mbajtje në pronësi, kontroll ose posedim të paautorizuar të armëve” nga neni 374, par.2 lidhur me par.1 të Kodit Penal. Detajet nga aktakuza, mund t’i gjeni: KËTU.

Ndërsa, më 27 dhjetor 2023, Prokuroria Speciale e Republikës së Kosovës (PSRK), ka ngritur aktakuzë kundër Milan Mihajloviq lidhur me rastin e vrasjes së Ivanoviqit, të cilin e ngarkon me katër vepra penale. /BetimipërDrejtësi/